由林夏薇、周嘉洛、梁菁琳、姜大衞、黃子恆、古佩玲、徐榮、陳庭欣、何沛珈、楊證樺和招浩明等人主演的新劇集《寵愛Pet Pet》，當中不少演員都有養寵物，甚至帶「小主人」一起開工客串此劇。在劇中飾演獸醫、養了一隻金毛尋回犬冬甩的林夏薇，在現實生活中養了3隻狗。儘管工作再忙，她都堅持做一個盡責任的好主人，在愛犬完成手術後，甚至瞓在地下陪牠休養，時刻相伴。
林夏薇平日與寵物一起生活，所以今次拍劇要跟小動物溝通，對她來說並不困難。周嘉洛曾表示她是「撩狗能手」，林夏薇接受《晴報》訪問時表示，拍戲時要與動物做對手，無論如何都有一定難度；幸好今次劇中飼養的冬甩十分聽話，拍攝時才能順利完成。但她就不忍心帶自己的寵物來客串劇集，「作為主人都唔想佢哋辛苦，同埋拍攝同玩唔一樣，需要顧太多嘢，我要專心拍戲，就好難兼顧小動物。劇入面嘅冬甩表演真係做得好好，好辛苦主人招浩明喺現場畀支持同協助。」
現實生活中，林夏薇絕對是一位「狗奴才」，家中養了3隻狗狗，分別是秋田犬金豬、哥基菠蘿和邊境牧羊犬木耳。她盡心盡力照顧3隻狗狗，就算再忙她每日都會抽時間與牠們交流。就算半夜收工累極，回家後都會跟3隻狗親親「請安」，她說：「每日返屋企都會同佢哋打招呼，同埋佢哋好忠誠，成日喺屋企等你返嚟。如果做嘢有需要，幾日唔可以喺屋企，就一定同佢哋講聲，叫佢哋唔好等門，如果唔講，佢哋真係會等好多日。」
林夏薇與3隻狗有很多美好的時光，除了經常帶牠們外出散步外，又會在大花園搭起帳篷一起玩露營。她又考慮到狗狗的關節問題，所以她特別帶小狗們去游水做運動。愛犬金豬曾患病，林夏薇跟其他狗主一樣，心痛如刀割。當時她貼身照顧愛犬，自己都特別感到難忘，「嗰次金豬要做大手術，當時金豬年紀都幾大，我好擔心佢。當日收工後就立即去醫院陪佢做手術。因為金豬好冇安全感，我知佢冇我哋喺身邊會好驚。我就想佢麻醉藥過咗，醒番嗰陣第一個會見到我。」
而且為了安撫金豬，林夏薇又跟醫生爭取，希望留醫一天後便可以帶金豬回家休養。完成手術後的狗狗需要特別監護，回家沒有護士24小時看管，林夏薇就自己負責，「每日我親自照顧金豬嘅飲食起居，做完手術真係要好好看管，怕佢會整到傷口，所以要睇得緊啲。嗰排差唔多日日都冇乜點瞓，時時刻刻喺佢身邊，陪佢瞓地下，瞓咗1個月，自己都腰骨歪晒，不過見到佢慢慢好番，咁我都安心啲。」
Credit: skypost