無綫《 萬千星輝頒獎典禮2025》在2026年1月4日在澳門上葡京綜合渡假村隆重舉行，黃宗澤在今屆頒獎禮，憑《新聞女王2》及《執法者們》兩套劇集，較早前已率先獲得「大灣區最喜愛TVB男主角」獎項。黃宗澤再下一城，16度提名視帝，終於打破宿命，首度奪得「最佳男主角」，黃宗澤爆喊說：「頭先攞完大灣區以為冇得再上嚟。」
出爐雙料視帝黃宗澤受訪，笑言當獲頒「大灣區最喜愛TVB男主角」時即打定輸數，：「我心諗死嘞，破咗道氣！但見到三哥（苗僑偉）行出嚟做頒獎嘉賓，又好似有啲希望喎，好開心喺佢手上攞獎。」談到今次得獎，估不到當宣布獲獎一刻自己會爆喊，尤其能在三哥手上得獎更感動：「（你本身好想攞？）我好佛系嘅，但情緒嘅嘢好難控制，所以上台忍唔住爆喊，況且台下有好多睇住我大嘅前輩，又播咗雪妮及唐佳生前嘅片段，感覺被打咗兩拳，當時已經喊咗一大餐。」而且台下又有一班看著自己成長的大前輩，包括姜大衛、曾志偉、高層樂易玲和曾勵珍等，令他相當感觸。
當被問到如何慶祝，他指明天要飛往南京公幹，打算之後會相約一班朋友食飯，亦打算宴請一班邵氏同事作慰勞：「會宴請《新聞女王2》台前幕後，大家整番個牛奶宴，淨係飲奶，冇飯食，簡簡單單咁慶祝啦。」又笑指要多謝媽媽努力使錢，令他更有動力拍戲賺錢。對於無綫總經理曾志偉宣布1月中卸任，他坦言：「我都好驚訝，不過佢辛苦咗咁耐，以佢嘅地位及年紀去享受吓啦，都已經見到有收成，無論返工定去玩，最緊要佢自己享受。」他又笑言以往演忠角未有得獎，反而今次演壞人竟然「一擊即中」，憑《新聞女王²》演衰人角色連獲兩獎，問是否打算繼續走壞人路線？：「咁係咪即係以後都要走奸角路線呀？唔知點解，以前拍好多正義角色冇攞獎，今次做衰人即刻攞兩個獎，要研究下。」