《女神配對計劃》兩對女神CP關嘉敏與黃家俊(Matthew)，聯同葉蒨文及曾展望，分成兩對在《善心滿東華》中唱歌籌款，關嘉敏與Matthew唱出《天梯》，而葉蒨文一對就唱出《因為愛情》，四人希望能用歌聲為大埔災民打氣，呼籲他們一定要努力撐下去，關嘉敏指今次事件對香港人來說是好大件事，希望大家能互相支持。
雖然關嘉敏是唱歌出身，但演出前關嘉敏與Matthew特別去錄音室練歌，兩人接受「娛樂新聞台」訪問時，關嘉敏指Matthew唱歌本來是完全唔啱音，但事隔一日就竟然突飛猛進，令她好愕然，畀對方93分，還好奇對方用甚麼方法可以令歌藝進步神速，Matthew就話自己領悟能力高，關嘉敏忍不住笑道:「即係話自己有天份，其實音準問題要搞幾個月，但佢一日就煥然一新，似變了另一個人，佢真係畀model耽誤咗的歌手。」Matthew對於唱歌自言一定有緊張，因為由中學至今十多年都未有唱歌。
在《女神配對計劃》後兩人日日都保持聯絡，問到何時才能跨越友誼，問Matthew兩人發展如何，Matthew立即答話發展都唔錯，令關嘉敏忍不住怕羞掩面笑，話想搵窿捐，並更正:「因為做嘢要緊，要忙準備東華，完咗節目先講。」Matthew話會繼續努力，關嘉敏表示如果對方在東華籌多些善款就可以考慮一下。